ఇండస్ట్రీలో రాణించాలనుకునే నూతన రచయితలకు ఆహ్వానం.. ఆడిషన్స్ నిర్వహించనున్న ZEE రైటర్స్ రూం

ఇండస్ట్రీలోకి కొత్త నీరు రావాలని అంతా అంటుంటారు. కొత్త వారు వచ్చినప్పుడు.. కొత్త కథా రచయితలు, దర్శకులు వచ్చిప్పుడు మరింత కొత్త కథలు పుట్టుకొస్తుంటాయి. అందుకే న్యూ టాలెంట్ హంట్‌ను ZEE నిర్వహిస్తోంది. కథా రచయితలు, దర్శకుల కోసం ZEE టీం ఆడిషన్స్ నిర్వహిస్తోంది. ఒరిజినల్ సిరీస్‌లు, కొత్త కంటెంట్, అద్భుతమైన చిత్రాలతో ZEE5 ఆడియెన్స్‌ను ఆకట్టుకుంటూ వస్తోంది. ఈ క్రమంలో కొత్త టాలెంట్ కోసం ZEE5 టీం కొత్త ఆలోచనను తీసుకు వచ్చింది.

ఇక ZEE5 టీం న్యూ టాలెంట్‌ను ఎంకరేజ్ చేసేందుకు ముందుకు వచ్చింది. ఈ క్రమంలో ZEE రైటర్స్ రూం అంటూ ఆగస్ట్ 30న ఆడిషన్స్ నిర్వహిస్తున్నారు. ఓటీటీ, ఫిల్మ్, టీవీ ఇలా ఏ ఫ్లాట్‌ఫాంకి అయినా సరే కొత్త కొత్త కథల్ని అందించాలని అనుకునే వారికి ZEE5 టీం అవకాశం కల్పిస్తోంది. ఇండస్ట్రీలోకి రావాలని అనుకునే వారికి, తమ కథల్ని ప్రపంచానికి చాటిచెప్పాలని అనుకునే కొత్త వారికి ZEE సంస్థ సదావకాశాన్ని కల్పిస్తోంది.

హైదరబాద్‌లో ఈ ఆడిషన్‌ను నిర్వహిస్తున్నారు. సారథి స్టూడియో ఎదురుగా మెట్రో స్టేషన్ సమీపంలోని శ్రీ చైతన్య జూనియర్ కళాశాలలో ఈ ఆడిషన్స్ జరుగనున్నాయి. ఉదయం 9 గంటల నుంచి మధ్యాహ్నం రెండు గంటల వరకు ఈ ఆడిషన్స్ నిర్వహించనున్నారు. మరిన్ని వివరాల కోసం 9397397771 సంప్రదించగలరు.

ఈ క్రమంలో ZEE5 చీఫ్ కంటెంట్ ఆఫీసర్ అనురాధ గూడుర్ మాట్లాడుతూ .. ‘ఇండస్ట్రీలోకి రావాలని అనుకునే వారు.. కొత్త కథలతో రాణించాలని అనుకునే వారికి మా ZEE రైటర్స్ రూం ఆహ్వానం పలుకుతోంది. కొత్త వారికి ఇదొక అద్భుతమైన అవకాశం. ఈ న్యూ టాలెంట్ రానున్న తరాన్ని, సినిమా కథల్ని మలిచే తీరుని మార్చగలరు. డిఫరెంట్ కంటెంట్‌తో కొత్త వారు ఇక్కడ అద్భుతాలు సృష్టించవచ్చు’ అని అన్నారు.