రాజ్యసభ రేసులో ఉత్తరాంధ్ర బీసీ నేతకు భారీ అవకాశాలు!

రాజకీయ వర్గాల్లో ఆసక్తికరంగా మారిన రాజ్యసభ ఎంపిక వ్యవహారంపై తాజాగా వెలువడిన ఈనాడు కథనం తర్వాత కీలక సంకేతాలు బయటకు వస్తున్నాయి. దాదాపు 17 ఏళ్లుగా ఎదురుచూస్తున్న ఓ ఉత్తరాంధ్ర బీసీ నేత పేరు ఇప్పుడు బలంగా వినిపిస్తోంది.

ప్రాంతీయ, సామాజిక సమీకరణాలకు ప్రాధాన్యం ఇస్తున్న నేపథ్యంలో ఉత్తరాంధ్రకు చెందిన బీసీ నాయకుడిని రాజ్యసభకు పంపించే దిశగా పార్టీ అధిష్ఠానం ఆలోచిస్తున్నట్లు రాజకీయ వర్గాల్లో చర్చ సాగుతోంది. 1983లో పార్టీ ఆవిర్భావం నుంచి కుటుంబానికి విధేయతతో కొనసాగుతున్న ఆయనకు ఈసారి అవకాశం దక్కొచ్చనే అభిప్రాయం వ్యక్తమవుతోంది.

అమెరికాలోని జార్జ్ వాషింగ్టన్ విశ్వవిద్యాలయం నుంచి మాస్టర్స్ డిగ్రీ పూర్తి చేసిన ఆయన, పార్టీ క్లిష్ట పరిస్థితుల్లోనూ వెనక్కి తగ్గకుండా పనిచేశారని నేతలు గుర్తుచేస్తున్నారు. ప్రతిపక్షంలో ఉన్న సమయంలో కేసులు, రాజకీయ దాడులు, ఒత్తిడులను ఎదుర్కొంటూనే పార్టీ కోసం కట్టుబాటుతో పనిచేయడం ఇప్పుడు ఆయనకు ప్రధాన బలంగా మారినట్లు తెలుస్తోంది.

ముఖ్యంగా నారా లోకేష్ బృందంలో ఆయన చూపిన నిబద్ధత, వ్యూహాత్మక వ్యవహార శైలి అధిష్ఠానం దృష్టిని ఆకర్షించినట్లు సమాచారం. ప్రచారానికి దూరంగా ఉండి, పార్టీ కోసం నిశ్శబ్దంగా పనిచేసే నాయకుడిగా ఉన్న ఇమేజ్ కూడా ఇప్పుడు అనుకూలంగా మారిందని రాజకీయ విశ్లేషకులు భావిస్తున్నారు.

భవిష్యత్ రాజకీయ సమీకరణాల్లో ఉత్తరాంధ్ర, బీసీ వర్గాలు కీలకంగా మారనున్న నేపథ్యంలో ఈ ఎంపిక ద్వారా పార్టీ స్పష్టమైన రాజకీయ సంకేతం ఇవ్వాలని చూస్తోందని టాక్ వినిపిస్తోంది. అధికారిక ప్రకటన ఇంకా వెలువడకపోయినా… ప్రస్తుతం జరుగుతున్న రాజకీయ చర్చలన్నీ ఒకే దిశగా సాగుతున్నాయి.